Gaur Bidelan AP-8ko hitzarmen berria negoziatzeko bigarren bilera izan da.
1.Art.- Xedea eta Lurralde eremua. Enpresak hitzarmen hau nortzuei aplikatuko zaien zehaztu nahi du. Gaur egungo hitzarmenak AP-8 autobidean Gipuzkoako Lurralde Historikoko zentroetan enpresaren zerbitzuan jarduten duten langileen arteko lan harremanak arautuko direla argi eta garbi ezarri arren, bulegoko langileak, arreta zerbitzukoak eta AT sistemako langileak kanpoan uztea planteatzen du enpresak.
LAB eta CCOOek planteamentu honekin bat datozela adierazi dute.
3.Art.- Indarraldia. Enpresak 4 urteko iraupena izango duen hitzarmena nahi duela dio, nahiz eta automatizazio prozesuen ondorioz etorriko diren aldaketak urtez urtez kudeatu nahi dituen.
7.Art.- Laneko plantilla. ELA sindikatuak artikulu honen bermerik gabeko atala kentzea eskatu zuen. Enpresak hain justu kontrakoa nahi du, bere esanetan plantilla murrizketa errealitate bat izango delako. Sortutako bakanteak hornitzeko prozedura ezartzeaz ez du ezer jakin nahi.
8.Art.- Lanaldia. ELA sindikatuak lanaldia urteko 20 ordutan murriztea proposatu zuen, 2020. urtean 1608 ordutara iritsiz. Hau da hain zuzen Bizkaiko eremuan kudeatzen duen enpresan sinatutako akordioa. Akordio hau AP-8an ordezkaritza dugun sindikatu guztiok sinatu dugu. Enpresak bere murrizketa proposamena ez du zehaztu baina automatikoa ez dela izango dio eta hitzarmenaren indarraldiari lotuta joango dela adierazi du. Gainontzeko kontuetaz, gaur egungo egoerara egokitzea planteatzen du eta txanda aldaketei dagokionez, enpresa hitzegiteko prest dagoela dio. Larunbatak jai egun izaera izango dutenaren proposamenari enpresak ezezkoa eman dio.
9.Art.- Kontratazioak. Automatizazio prozesuaren ondoren egoera aldakorra izan arren, enpresak atalen arteko aldaketa ugaririk ez dela izango dio.
11.Art.- Lanaldi etengabeko atsedenaldia. 15 minututik 20ra igotzeko ELAren proposamenari enpresaren erantzuna ezezkoa izan da.
12.Art.- Lan-txandetako erreleboak. Lan txanda bakoitzeko 15 minutuko lan denbora konputatzeko ELAren proposamenari, enpresak ezezkoa eman dio.
13.Art.- Gabonetako lana. ELAren 100 €tako proposamenari ezezkoa.
14.Art.- Ordainsariak. Enpresak indarraldiaren urte bakoitzeko KPIa igotzea proposatu du.
17.Art.- Aparteko orduak. Enpresak ELAren proposamenarekin bat datorrela dio, hau da, sortutako orduak denboran gozatzearena. Gehiengoak denboran gozatzen omen ditu ordu hauek baina datua ekarriko duela dio. Lanpostua derrigor betetzearenari ezezkoa, nahiz eta enpresaren ohiko jarduera hau izan, baina egoera berrian betetzeko beharrik ez izatea gerta daitekela dio enpresak.
18.Art.- Antzinatasuna. ELAk bosturteko bat igotzea planteatu zuen; enpresak ezetz dio. Diru kopuruei ere ezezkoa. Enpresaren proposamena: kopuruak izoztuta mantentzea. Bere ustetan kantitateak jada altuak omen dira. Legezko zaintzarako lanaldi murrizketa izanez gero penalizaziorik ez izateari, enpresak ezezkoa.
20.Art.- Oporrak. Epealdia handitzeko ELAren proposamenari, enpresak apuntatzen duela dio. Ordainlekuetan araututakoa gainontzeko sekzioetan aplikatzeko proposamena aztertu egin behar omen du enpresak.
21.Art- Gaixotasuneko edo istripu bajak. ELA sindikatuak gaueko eta jai egunetako lan egunak baja garaian ere ordaintzea eskatu zuen (bestela ez daukagu baja garaian gure soldataren %100a bermatuta). Eskaera honi enpresak ezezkoa.
23.Art.- Bizita eta istripu asegurua. Kantitate igoeraren eskaerei erantzunez enpresak behar diren koberturak betetzeko aseguru etxeak aurkitzeko arazoak dituztela adierazi du. Oraindik hainbat kontu jorratzeko geratzen dira eta hurrengo bileran eztabaidatuko dira (2019ko apirilak 16).
ELA sindikatuak aurkeztutako plataformaren proposamen ia guztiei enpresak EZEZKOA eman dio. Enpresak iraupen luzeko hitzarmena nahi du, honek bere interesen alde egiten duelakoan. Gainera bere planteamentu guztiak beti automatizazioak ekarriko dituen aldaketen baitan daude, baita plantillan izango duen eraginari dagokionez ere.
